Wi-Fi tehnologiýasy biziň durmuşymyza berk ornaşyp ,onuň aýrylmaz bir bölegine öwrüldi. Ýöne eýýäm Wi-Fi-iň täze bir bäsdeşi döreýär. Bu täze Li-Fi tehnologiýasy. Garaşylmagyna görä ,bu tehnologiýa maglumatlary has ýokary tizlik bilen ibermegi üpjün eder hem-de sim geçirijisiz ulgamlarynyň geljegi üçin täze mümkinçilikleri açar.

Wi-Fi tehnologiýasynda aragatnaşyk radio tolkunlar arkaly amala aşyrylýar. Li-Fi bolsa, açyk giňişlikdäki ýagtylygy aragatnaşyk ulgamy hökmünde ulanýar. Ýagtylyk diodlaryň örän ýokary tizlikde «açylyp öçürilmegi» netijesinde bu signallar ýörite kabul ediş enjamlary tarapyndan kabul edilýär hem-de özgerdilýär.

Li-Fi tehnologiýasy ýagtylyk diod lampalary arkaly ýokary geçirijilik ukyby bolan ulgamy döredýär. Ýagtylygyň çeşmeden kabul edijä iberilmegi ýörite düzümleriň üsti bilen üpjün edilýär.

Li-Fi-da maglumatlary ibermegiň tizligi sekuntda 224 Gbit ýetip bilýär. Munuň özi Wi-Fi-iň iň ýokary tizliginden hem ep-esli ýokarydyr. Muňa düşünmek üçin şeýle bir mysal getireliň: bir sekundyň dowamynda her biriniň göwrümi 1,5 Gb bolan kinofilmleriň 18-sini ýükläp bolýar!

Şeýle hem bu täze tehnologiýany radio tolkunlarynyň ulanylmagy göwne jaý hasapalanylmaýan ýerlerde, meselem: hassahanalarda, uçarda ulanmak bolýar.

Eýýäm biziň günlerimizde Li-Fi tehnologiýasy synag taslamasy hökmünde birnäçe ulgamlarda ,şol sanda awisasiýada jemgyýetçilik interneti üçin ulanyldy.

Häzirki günde Li-Fi-iň artykmaçlyklary bilen bir hatarda, birnäçe kemçilikleri hem bar. Olaryň üstünde işlenilýär we bilermenleriň aýtmagyna görä, bu täze tehnologiýa ýakyn ýyllarda ýokary tehnologiýalar ulgamynda täze açyş hökmünde özüni görkezer.

ORIENT news