Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Fransuz MLF mekdebi bilen Bäşim Nuraly adyndaky Aşgabat çeperçilik mekdebiniň bilelikde guran çäresi oňa ýaş gatnaşyjylarynyň durmuşynda ýakymly we ýatda galyjy waka boldy. Iki mekdep hem uly sabyrsyzlyk bilen garaşan duşuşyk diňe bir gyzykly bolman, eýsem döredijilik many-mazmuny bilen hem tapawutlanjakdy.
Fransuz mekdebiniň okuwçylary täze dostlary üçin soraglaryň sanawyny öňünden taýýarlapdyrlar, hem-de Nuraly adyndaky mekdebiň okuwçylaryna sowgat hökmünde professional galam toplumlaryny getiripdirler. Ýaş suratkeşler bolsa has şahsy we örän özboluşly zat bilen taýýarlandylar: olar öňünden alnan suratlara görä MLF mekdebiniň okuwçylarynyň portretlerini döredipdirler.
Ahyrsoňy sabyrsyzlyk bilen garaşylan gezelenç güni hem gelip ýetdi. Duşuşygyň öňüsyrasynda kiçiräk bir degişme ýagdaýy bolup geçdi: myhmanly awtobus sürüjiniň öňünden berlen görkezmesine garamazdan, giňden açyk derwezeleriň we el çarpyşyp garşy alýan “nuralyçylaryň” ýanyndan geçip gidipdir. Şeýle-de bolsa, kiçijik düzedişden soň “azaşan” myhmanlar şatlyk bilen yzyna dolandyryldy.
Bäşim Nuraly adyndaky mekdebiň müdiri myhmanlary mähirli garşylady:
— “Baý taryhy we däp-dessurlary bolan mekdebe hoş geldiňiz!”
Fransuz okuwçylary arassa saklanylýan mekdep meýdançasynyň rahatlygyny derrew duýdular. Baş girelgäniň öňündäki meşhur türkmen suratkeşi Bäşim Nuralynyň heýkeli myhmanlarda aýratyn gyzyklanma döretdi — bu mekdebiň adyny göterýän suratkeşiň hatyrasyna gurnalan ýadygärlik.
Mekdebiň girelgesinde goýlan hormatly baýraklar, diplomlar, bu mekdebiň diňe bir bilim edarasy däl, eýsem birnäçe nesil zehinli türkmen suratkeşlerini, zergärlerini we haly ussatlaryny yetişdiren döredijilik ojakdygyny görkezýärdi. Häzirki okuwçylaryň işleri ýerleşdirilen diwarlardaky stendler, şeýle hem her iki hepdeden bir gezek täzelenýän şahsy sergi däbi myhmanlarda uly täsir galdyrdy.
Gezelenç iň kiçi topar — birinji synplardan başlandy. Çeperçilik mekdebine kabul ediş 12 ýaşdan, üç kyn synagy geçenden soň alnyp bilinýän hem bolsa, “birinji synpdakylar” eýýäm çynlakaý çemeleşme görkezýärdiler. Olaryň sapagy açyk meýdanda — açyk asmanyň astynda geçdi, okuwçylar mekdep bagynyň güýz manzarasyndan ylham alyp çyzgylary döredýärdiler. Myhmanlar olaryň işlerini janly tebigat bilen deňeşdirip görýärdiler.
Ikinji synp okuwçylary natýurmort bilen meşguldy, emma olar myhmanlar bilen gürrüňdeş hem bolýardylar: olar surat tehnikalary we ulanylýan materiallar barada gürrüň berdiler. Uzyn geçelgeler boýunça hereket etmek — şol bir wagtyň özünde mekdebiň iň gowy işleriniň galereýasyndan geçmekdi. Munuň özi hakyky medeni aralaşma öwrüldi. Türkmen däp-dessurlaryndan, halk ertekilerinden, gündelik ýaşaýyş pursatlaryndan çekilen suratlar myhmanlaryň uly gyzyklanmasyny döretdi.
Üçünji we dördünji synplarda okuwçylaryň eýýäm has ýokary dereje görkezýändigini görmek bolýar. Olaryň işlerinde çylşyrymly tehnika, inçe reňk sazlaşygy we takyk çyzyk agdaklyk edýär. Myhmanlar aýratyn elde çyzylan absolýut tekiz kubyň we şaryň çeper ýerine ýetirilmegine haýran galdylar — sebäbi kömekçi gurallary ulanmak gadagandyr. Geljekkki hünärmenler boljak bu uçurymlar öz ussatlygynyň diňe çeperçilikde däl, binagärlikdäki we dizaýndaky ähmiýetini düşündirdiler.
Wagt çalt geçdi, gezelenç bolsa sowgat gowşurylyş dabarasy bilen tamamlandy. Bu sowgatlar — ýaş nuralyçylaryň fransuz okuwçylarynyň suratlaryna görä çeken portretleridi. Müdiriň her bir suraty öwrüp görkezmegi, ony kime degişlidigini myhmanlaryň özleriniň tapmagy dabarany has-da täsirli etdi.
Ilkinji portretiň görkezilmegi bilen şowhunly el çarpyşmalar we: “Bu — Týudor ahyry!” diýen şatlykly sesler ýaňlandy. Ÿylgyryp duran okuwçynyň özi portretini almak üçin öňe çykdy. Her at aýdylanda ýürekden çykýan şadyýan çaga sesleri dabarany baýramçylyk ruhuna besläp gitdi.
Yza gaýdyşyn awtobusdaky her bir fransuz okuwçysy ulylar olaryň portretlerini aýratyn goýmagy haýyş eden hem bolsalar öz portretini elinden duşürmek islemän saklady. Sebäbi bu sowgatlaryň her biri diňe bir ýadygärlik däl, eýsem Bäşim Nuraly adyndaky mekdebiniň baý döredijilik däpleriniň, döredijilikli dostlugyň bir bölegi hökmünde mähirlilik bilen kabul edildi.
Aýna ŞIROWA
