Anna güni Pekinde 2026-njy ýylyň Pekin halkara awtoulag sergisi — Auto China 2026 açyldy, onda 181 täze model ilkinji gezek görkezildi.

“Intellektiň geljegi” şygary bilen geçirilýän sergi şu ýyl elektromobiller we akylly ulag serişdeleri babatda gazanylan iň soňky üstünlikleriň giňişleýin tanyşdyrylyşyny hödürleýär, şeýle hem açyklyk we innowasiýalar arkaly Hytaýyň awtoulag senagatynyň global özgertmelere bolan güýçli itergisini görkezýär.

Sergi hem Hytaý halkara sergiler merkeziniň (Şunýi zaly), hem-de Hytaý paýtagt halkara merkeziniň meýdançalarynyň doly ulanylmagy bilen geçirilýär. Umumy meýdany 380 müň inedördül metre ýetip, bu görkeziji boýunça dünýäde iň uly awtoulag sergisine öwrüldi.

Bu ýylky sergi dünýäniň 21 ýurdundan we sebitinden öňdebaryjy awtoulag öndürijilerini, tehnologiýa kompaniýalaryny we üpjün edijileri bir ýere jemledi.

Sergide jemi 1451 awtoulag görkezilýär, olaryň arasynda 71 konsept-awtoulag bar. Täze energiýa çeşmelerine degişli ulaglar umumy sanynyň 80 göteriminden gowragyny emele getirip, rekord derejesine ýetdi.

Hytaý brendleri ýokary innowasion işjeňligini görkezýär.

Harmony Intelligent Mobility Alliance — hytaý tehnologik ägirdi Huawei kompaniýasynyň awtoulag bölümi — Guangzhou Automobile Group bilen hyzmatdaşlykda garaşylýan Aistaland GT7 modelini hödürledi. Bu köpugurly ulag iň täze akylly sürüji kömek ulgamy we Huawei-niň çalt zarýad tehnologiýasy bilen üpjün edilendir.

Şol bir wagtda BYD özüniň täze doly ölçegli “Datang” wnedorožnik modelini tanyşdyrdy. Ol örän ýokary tiz zarýad almak mümkinçiligi bilen tapawutlanýar. Kompaniýanyň bellemegine görä, bu ulag kofe içmek üçin gerek bolan wagtyň dowamynda 80 göterime çenli zarýad alyp bilýär.

Xiaomi Vision Gran Turismo — dünýä belli Gran Turismo 7 oýny üçin işlenip taýýarlanan konsept superkar — hem ilkinji gezek ýurduň içinde görkezildi. Bu model Xiaomi kompaniýasynyň ýokary öndürijilikli elektromobilleriň geljegi baradaky garaýşyny görkezýär

Dünýäde akylly gajetleri bilen tanalýan Xiaomi kompaniýasy Hytaýda birnäçe üstünlikli modelleri çykarylandan soň, global awtoulag bazaryna çykmagy maksat edinýär.

“Kompaniýamyzyň daşary ýurt bazaryndaky ilkinji ädimi Germaniýa bolar — bu dünýäniň iň çylşyrymly awtoulag bazarlarynyň biridir. Bu biziň üçin täze innowasion ýol bolar. Biz beýleki awtoulag pudagynyň gatnaşyjylary bilen ýakyndan hyzmatdaşlyk edip, ulaglarymyzyň sürüjilik aýratynlyklary we akylly ekoulgamy arkaly tutuş pudagyň ösüşine goşant goşmagy maksat edinýäris. Şeýle hem daşary ýurt bazary boýunça toparymyzyň Xiaomi Auto brendini dünýä derejesinde üstünlikli ornaşdyrmagyna umyt edýärin,” diýip, Xiaomi kompaniýasynyň esaslandyryjysy we başlygy Leý Szun aýtdy.

Nemes premium brendleri Hytaý bazary üçin ýörite uýgunlaşdyrylan täze modelleri işläp taýýarlamak boýunça tagallalaryny güýçlendirýärler.

BMW kompaniýasy hytaýly alyjylar üçin yzky ýolagçylara has giň ýer hem-de hytaý tehnologiýa kompaniýasy bilen hyzmatdaşlykda döredilen akylly dolandyryş ulgamyny hödürleýän iX3 Long Wheelbase modelini tanyşdyrdy.

Çäräniň dowamynda ilkinji gezek köpçülige Audi bilen SAIC Motor tarapyndan bilelikde işlenip taýýarlanan E7X atly wnedorožnik ulagy hem görkezildi.

Amerikan brendleri hem işjeň uýgunlaşýarlar.

General Motors awtosalonda ýerli aýratynlyklara uýgunlaşdyrylan akylly dolandyryş panelleri bilen birnäçe täze modelini görkezýär we ýokary bäsdeşlikli hytaý bazarynda has köp müşderini çekmegi maksat edinýär.

General Motors kompaniýasynyň premium brendi bolan Cadillac bolsa Hytaý üçin ýörite uýgunlaşdyrylan VISTIQ atly elektromobili tanyşdyrdy. Kompaniýanyň ýolbaşçylarynyň biriniň bellemegine görä, bu model Demirgazyk Amerikadaky müşderilerde hem gyzyklanma döredýär.

“Kompaniýamyzyň bu modelinde yzky ýolagçylar üçin maglumat-güýmenje ulgamy we aýratyn ýokary derejeli oturgyçlar bar — bu aýratynlyklar Demirgazyk Amerikada we Ýewropada elýeterli däl. VISTIQ ulagynda hytaý kompaniýasy Momenta bilen hyzmatdaşlykda döredilen öňdebaryjy sürüji kömek ulgamy we dünýäniň öňdebaryjy LiDAR üpjün edijileriniň biri bolan Hesai Technology tarapyndan işlenip taýýarlanan LiDAR ulgamy ýerleşdirilen. Hytaýyň ýokary tehnologiýa kompaniýalary bilen ýakyn hyzmatdaşlyk netijesinde biz hytaý elektromobil bazarynyň ösüş tendensiýalaryna doly laýyk gelýän ulag döretdik,” diýip, Cadillac kompaniýasynyň önüm menejeri Şi Wensze aýtdy.

Üpjünçilik zynjyrynda işleýän kompaniýalar hem şu ýylky awtosalonda möhüm orun eýeleýär.

CATL, EVE Energy we Huawei ýaly öňdebaryjy üpjün edijiler batareýalar, akylly sürüjilik tehnologiýalary we ulag maglumat-güýmenje ulgamlary ýaly ugurlarda öz tehnologiýalaryny görkezmek üçin aýratyn sergi meýdançalaryny döretdiler.

Akkumulýator senagatynyň ägirdi bolan CATL tarapyndan hödürlenen täze nesil aşa çalt zarýad alýan batareýa aýratyn üns çekdi. Kompaniýanyň bellemegine görä, bu batareýa birnäçe minudyň dowamynda ýüzlerçe kilometr ýol ätiýaçlygyny üpjün edip bilýär, bu bolsa hytaýly müşderileriň esasy aladalarynyň biri bolan zarýad tizligi meselesine gönüden-göni jogap berýär.

“Bu ýylky awtosalonda biz Shenxing üçünji nesil aşa çalt zarýad alýan batareýamyzy görkezýäris. Biziň çalt zarýad tehnologiýamyz batareýany 10%-den 98%-e çenli bary-ýogy alty minutda zarýadlamaga mümkinçilik berýär. Adaty ýagdaýda litiý-demir-fosfat batareýalary sowuk howada haýal zarýad alýar, emma biziň öz-özünden gyzdyrma tehnologiýamyz -30°C temperaturada hem çalt zarýad almaga mümkinçilik berýär we batareýany dokuz minutdan az wagtda doly zarýadlap bolýar,” diýip, CATL kompaniýasynyň inženeri Szi Ýuançun aýtdy.

Awtosalon 3-nji maýa çenli dowam eder.