Ženewada Halkara zähmet maslahatynyň 114-nji sessiýasy öz işini dowam edýär. Onda Türkmenistanyň wekiliýeti iş bilen üpjünçilik ulgamyny döwrebaplaşdyrmaga we zähmetkeşleriň hukuklaryny goramaga baradaky toplumlaýyn çemeleşmesini görkezýär. Plenar mejlisde degişli edaralaryň ýolbaşçylary döwlet syýasatynyň esasy ugurlaryny we ýurduň jemgyýetçilik guramalarynyň eýeleýän ornuny tanyşdyrdylar.
Ählumumy forumynyň wekilleriniň öňünde çykyş edip, Türkmenistanyň zähmet we ilaty durmuş taýdan goramak ministri Muhammetseýit Sylapow Halkara zähmet guramasynyň şu gezekki sessiýasynyň gün tertibine, ýagny mynasyp zähmeti üpjün etmek üçin emeli aňdan peýdalanmaga gönükdirilen meselelerine ýokary baha berdi.
Edaranyň ýolbaşçysy ykdysadyýetiň ähli pudaklarynyň düýpli sanlylaşdyrylmagynyň, elektron hökümetiň we sanly bilimiň ösdürilmeginiň şu günki günde Türkmenistanyň döwlet syýasatynyň iň esasy ugurlarydygyny nygtady. Şunda ýurt tehnologik ösüşe adama gönükdirilen çemeleşmä berk eýerýär.
Tehnologiýalar we emeli aň adamyň ukyplaryny açmak üçin gural hökmünde hyzmat etmelidir. Biziň maksadymyz — emeli aňyň ornaşdyrylmagynyň hünär başarnyklarynyň yzygiderli ösdürilmegine, zähmet öndürijiliginiň ýokarlandyrylmagyna we netijede tutuş jemgyýetiň abadançylygynyň pugtalandyrylmagyna hyzmat etmegini gazanmakdyr” diýip, ministr belledi.
Muhammetseýit Sylapow, şeýle hem Türkmenistanyň uzak möhletleýin bilelikdäki başlangyçlaryň çäklerinde HZG (Halkara zähmet guramasy) bilen strategik hyzmatdaşlygy giňeltmäge doly taýýardygyny resmi taýdan tassyklady.
Ženewa maslahatynyň çäklerinde Türkmenistanyň raýat jemgyýeti hem özüniň ornuny tanyşdyrdy. Sessiýada zähmetkeşleriň adyndan ýurduň Kärdeşler Arkalaşyklarynyň Milli merkeziniň başlygy Oguljennet Berdiliýewa çykyş etdi.
Onuň hasabatynda zähmet gatnaşyklaryny kämilleşdirmek hem-de HZG we Zähmetkeşleriň işi boýunça býuro (ACTRAV) bilen özara gatnaşyk kanallary arkaly netijeli durmuş hyzmatdaşlygyny ösdürmek meseleleri üns merkezinde boldy.
Kärdeşler arkalaşyklarynyň Milli merkeziniň ýolbaşçysy bilelikdäki taslamalaryň amaly netijelerine aýratyn üns berdi. Şu günki günde Türkmenistan halkara hyzmatdaşlary bilen bilelikde kärdeşler arkalaşyklarynyň işgärleriniň hünärini ulgamlaýyn ýokarlandyrmak; halkara zähmet standartlaryny ilerletmek we milli tejribä ornaşdyrmak; ýaşlaryň iş bilen üpjünçilik mümkinçiliklerini giňeltmek; iş ýerlerinde gender deňligini üpjün etmek we zähmeti hemmetaraplaýyn goramak boýunça maksatnamalary işjeň ösdürýär.
Kärdeşler arkalaşyklarynyň açyk durmuş ugurly dialoga jemgyýetçilik durnuklylygyny saklamagyň we durnukly ykdysady ösüşi üpjün etmegiň täsirli mehanizmi hökmünde garaýandygy aýratyn nygtaldy. Işgärleriniň hukuklaryny we azatlyklaryny goramak maksady bilen halkara gatnaşyklaryny giňeltmek ugry gurama üçin strategiki taýdan ähmiýetli bolup galýar.
