Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
2026-njy ýylda syýahatçyny hakykatdanam näme bagtly edýär? Bu soraga “G Adventures” halkara agentligi özüniň her ýylky “Bagt sanawyny” (Happiness List) çap etmek bilen jogap berdi. Merkezi Aziýa — Türkmenistan, Gazagystan, Gyrgyzystan, Özbegistan we Täjigistan — okyjylara “çuňňur şatlyk we medeni baýlyk” peşgeş berýän esasy ugurlaryň biri hökmünde ykrar edildi.
Näme üçin Merkezi Aziýa?
“G Adventures”-iň bilermenleriniň “gysga wagtlaýyn” diýip atlandyrýan kenar ýakasyndaky dynç alyşlaryndan tapawutlylykda, Merkezi Aziýa sebiti taryhy gatlaklarynyň köplügi sebäpli bu sanawa girdi. Beýik Britaniýadan, ABŞ-dan we Ýewropadan gelen syýahatçylar bu ýerde şulary gözleýärler: hakykylyk — Beýik Ýüpek ýolunyň janly mirasyny duýmak mümkinçiligi, häzirki zaman paýtagtlarynyň futuristik arhitekturasynyň, gadymy ýadygärlikleriň we sebitiň belent, ajaýyp görnüşleriniň özboluşly utgaşmasy. “G Adventures” kompaniýasynyň “jemgyýetçilik syýahaty” atly aýratyn ugry Merkezi Aziýada özüne mynasyp ýeri tapýar — myhmansöýerlik bu ýeriň halkynyň ganynda bar.
Merkezi Aziýanyň ýurtlarynyň “bäşliginiň” hemmesiniň şeýle abraýly sanawa girizilmegi sebit üçin bitewi syýahatçylyk brendiniň kemala gelýändigini habar berýär. Türkmenistan üçin bu ekologiýany gymmatly saýýan, däp-dessurlary hormatlaýan we ýurdy çuňňur öwrenmäge taýýar bolan “aňly-düşünjeli syýahatçylaryň” gyzyklanmasynyň artýandygyny aňladýar.
“G Adventures” — başdan geçirmeler we jogapkärli syýahatçylyk babatda dünýä liderleriniň biri — sosial ulgamlarda mazmunlara ýa-da “meşhur möwsümleýin ugurlara” däl-de, köpçülikleýin sowalnama daýandy. Bu gözlege geljek ýyl syýahatlary meýilleşdirýän 8 000 adam gatnaşdy.
2026-njy ýylda “bagt” düşünjesiniň esasy ölçegi şahsy rahatlygy ýerli jemgyýetleriň ösüşine goşant goşmak mümkinçiligi bilen utgaşdyrmak diýlip kesgitlenildi. Netijede, kompaniýa ünsüni geografiýadan duýgulara gönükdirdi: adamlaryň syýahat wagtynda nämeleri başdan geçirmek isleýändikleri – rahatlyk, täzelenme, ýakynlary bilen baglanyşyk duýgusy ýa-da tebigat arkaly “gaýtadan güýç toplamak”.
“Bagt sanawy” boýunça goňşular: Ählumumy täsirleriň kartasy
Suratyň doly bolmagy üçin, hünärmenleriň aýratyn bellän we 2026-njy ýylda syýahatçylaryň ünsüni çekmekde bäsleşjek ýene dokuz ugur bar:
ORIENT salgylanmasy: “Ýagşylygyň güýji” filosofiýasy
“G Adventures” – bu Kanadanyň kompaniýasy bolup, ol 1990-njy ýylda Brýus Pun Tip tarapyndan esaslandyryldy. Ol däp bolan syýahatçylyk agentligini durmuş ugurly kärhana öwürdi. Onuň pikiri, syýahatçylygyň ýerli jemgyýetleriň gülläp ösmegine ýardam edýän “ýagşylygyň güýji” (Force for Good) bolmalydygydyr.
Häzirki wagtda olaryň dünýäde 28 sany ofisi (şol sanda ABŞ-da we Beýik Britaniýada) bar we ählumumy derejede işleýär, olaryň «ýüregi», ştab-kwartirasy we kökleri –Kanadanyň Toronto şäherinde ýerleşýär. “G Adventures” ilkinji nobatda özüniň özboluşly filosofiýasy bilen gyzyklanma döredýär. Eger syýahatçylyk kompaniýalarynyň köpüsi “myhmanhanalary we kenarýakalary” satýan bolsalar, “G Adventures” bolsa “community tourism” (jemgyýetçilik syýahat) satýar.
“National Geographic” bilen hyzmatdaşlyk: Olaryň “National Geographic Journeys” syýahatlarynyň eksklýuziw ugry bar. Bular medeniýete we taryha gönükdirilen çuňňur, gözleg syýahatlarydyr.
“Ripple Score”: Bu olaryň esasy aýratynlygy. Olar syýahatdan alnan girdejiniň näçe göteriminiň gönüden-göni ýerli ýaşaýjylara (gidlere, myhmanhanalaryň eýelerine, senetçilere) gidýändigini görkezýärler. Adatça, bu görkeziji 90% -den ýokary bolýar.
Türkmenistan olaryň syýahat ugurlarynda: Olar Ýüpek ýoly boýunça toparlary işjeň alyp barýarlar. Olaryň standart ugurlary Aşgabat, Derweze (gaz krateri), Köneürgenç we Mary (Merw) şäherlerini öz içine alýar. Olar üçin Türkmenistan «ultimate less-ventured destination» (iň bir öwrenilmedik ugur).
