Bitarap interýerleriň we sada egin-eşigiň döwri geçmişde galdy. Meşhur Pinterest platformasy 600 million ulanyjynyň gözleglerini seljerip, şeýle netijä geldi: 2026-njy ýylda adamlar özlerini batyrgaý, täsirli reňkler bilen gurşap alarlar. Adaty çal we çäge reňkleriniň ýerine keýpi dolandyrmaga we özboluşly gurşawy döretmäge kömek edýän reňkler öňe çykýar.

Bäşlik öňdebaryjylary: täzelikden neona çenli

Iň islegli reňkleriň sanawyna bäş aýratyn öwüşgin girdi. Buz ýaly gök reňki arassalyk we tertip duýgusyny döredýär, iş zolaklary üçin örän amatlydyr. Nefrit ýaşyllygy interýerlere «asuda nepislik» we tebigy rahatlyk goşýar. Garamtyl garaly reňki agşamky geýimlerde we üns cekýän jikme-jikliklerde dramatizm hem-de syrlylyk döretmegiň esasy serişdesine öwrüler.

Synaglara taýyn bolanlar üçin bilermenler neonly laým reňkini aýratyn belläp geçdiler. Bu batyrgaý öwüşgin esasan aksessuarlarda we grafiki dizaýnda has gowy görünýär. Palitrany tamamlaýan hurma reňki — ýyly mämişi-gyzyl öwüşgin bolup, derrew keýpi göterýär we giňişligi has myhmansöýer edýär.

Pinterest diňe bir owadan reňkleri saýlaman, eýsem taýýar çözgütleri hem teklip etdi. Mysal üçin, buz gögi bilen neonly laýmyň utgaşmasy «dolandyrylýan haos» täsirini döredýär, hurma bilen garalynyň jübüti bolsa ýylylygyň we syrlylygyň deňagramlylygyny üpjün edýär. Platformanyň döredijilik direktory Ksante Uellsiň sözlerine görä, häzirki wagtda adamlar ýalňyşmakdan gorkmaýarlar we reňki özüni beýan etmegiň serişdesi hökmünde oýlanyşykly ulanmaga başladylar.

Seljerme kompýuter görüş algoritmleri arkaly geçirildi, olar diňe aýratyn reňkleri däl-de, eýsem ulanyjylaryň tagtalaryndaky olaryň utgaşmalaryny hem öwrenýärdi. Bu çaklama dizaýnerler, brendler we ýakyn wagtda öýüni ýa-da egin-eşigini täzelemegi meýilleşdirýänleriň hemmesi üçin möhüm ugrukdyryjy bolar.

ORIENT