18-nji martda Türkmen döwlet binagärlik we gurluşyk institutynda «Materiallaryň garşylygy» dersi boýunça V Açyk halkara internet olimpiadasy geçirildi. Intellektual bäsleşige Türkmenistanyň we daşary ýurtlaryň ýokary okuw mekdepleriniň talyplary gatnaşdylar.

Olimpiada rekord derejede — 877 talyby birleşdirdi. Bäsleşige ABŞ, Awstraliýa, Germaniýa, Rumyniýa, Malaýziýa, Hytaý, Russiýa, Belarus, Gazagystan, Gyrgyzystan, Azerbaýjan, Özbegistan, Türkiýe, Uganda we Pakistan ýaly ýurtlardan, şeýle hem Türkmenistanyň öňdebaryjy ýokary okuw mekdeplerinden ýaşlar gatnaşdy.

Çäräni institutyň rektorynyň wezipesini ýerine ýetiriji M. Babaýew gutlag sözi bilen açdy. Ol ýurdumyzyň bilim ulgamyny dünýäniň ylym-bilim giňişligine integrirlenmegiň hem-de sanly tehnologiýalary işjeň ornaşdyrmagyň möhümdigini nygtady.

Intellektual marafon bir tapgyrda sanly okuw ulgamy arkaly geçirildi. Gatnaşyjylara degişli tema boýunça 6 sany çylşyrymly meseläni çözmek teklip edildi. Tabşyryklary ýerine ýetirmek üçin takyk 120 minut wagt berildi.

Bahalandyrmagyň adalatlylygyny halkara eminler topary üpjün etdi. Onuň düzümine daşary ýurtlaryň öňdebaryjy tehniki ýokary okuw mekdepleriniň professorlary we mugallymlary girdi. Bu dürli ýurtlaryň inženerçilik mekdepleriniň arasynda täsirli tejribe alyşmaga mümkinçilik berdi.

Olimpiadanyň geçirilmegi çylşyrymly inženerçilik meseleleriniň çözgüdini özbaşdak tapmaga ukyply zehinli ýaşlary ýüze çykarmaga gönükdirilendir. Talyplaryň halkara bäsleşiklerde gazanan üstünlikleri milli bilim ulgamynyň abraýyny ýokarlandyrýar we Türkmenistanyň ykdysadyýetiniň innowasion pudaklary üçin ýokary hünärli işgärleri taýýarlamaga ýardam edýär.

ORIENT