Myrat Garryýew adyndaky Türkmenistanyň Döwlet lukmançylyk uniwersitetiniň mugallymy Mähri Daňatarowa Astanada geçirilen halkara bäsleşikde goşa ýeňiş gazandy. Ol «GDA-nyň iň gowy mugallymy» we «GDA-nyň iň gowy ýaş alymy» diýen hormatly atlara mynasyp boldy we ýurdumyzyň lukmançylyk ylmynyň ýokary derejesini görkezdi.

Gazagystanyň paýtagtynda geçirilen bu halkara taslama «Bilim-orkenieti» ylmy-barlag merkezi hem-de «Zana Gazagystan» merkezi tarapyndan guraldy. Bäsleşigiň esasy maksady — GDA ýurtlarynyň arasynda iň zehinli mugallymlary we alymlary ýüze çykarmak hem-de goldamakdan ybaratdyr.

Mähri Daňatarowa eminler toparyna özboluşly ylmy işini hödürledi. Onuň barlag işi ultrafonoforez usuly arkaly laktoza geliň ulanylmagyna bagyşlanandyr. Bu usul ultrasesiň täsiri bilen derman serişdeleriniň dokumalara has çuň aralaşmagyna mümkinçilik berýär. Bu iş innowasionlygy we lukmançylyk üçin amaly ähmiýeti sebäpli ýokary baha mynasyp boldy.

Bäsleşigiň netijeleri boýunça Mähri Daňatarowa I derejeli diplom, halkara sertifikat we hormatly döş nyşany bilen sylaglandy.

Bu üstünlik Türkmenistanda bilimiň ýokary derejesiniň hem-de ýaşlaryň ylmy kuwwatynyň barha ösýändiginiň nobatdaky subutnamasydyr. GDA derejesindäki bu ykrar ediş türkmen alymlarynyň işleriniň bäsdeşlige ukyplydygyny we halkara hünär jemgyýetçiliginde uly gyzyklanma döredýändigini görkezýär.

ORIENT