Biz ýakynlaşmagy ugur edinýäris

Hytaýyň Şençžen şäherinde köpçülikleýin ulag ulgamynda özboluşly täzelik peýda boldy: 7-Eleven dükanlary üçin harytlary metro arkaly eltýän 41 sany awtonom robot-eltip beriji işe girizildi. Bu pingwine meňzeýän enjamlaryň metropoliten ulgamyna doly integrirlenen dünýäde ilkinji eltip beriji robotlarydygy bellenilýär.

Robotlar ýolagçy akymynda ugrukmak üçin giňişligi skanirleýän döwrebap ulgam we çaknyşyklardan gaça durmak üçin algoritmler bilen enjamlaşdyrylandyr. Olar liftleri özbaşdak çagyrmaga, ýörite çipler arkaly turniketlerden geçmäge we otlylaryň hereket tertibi bilen utgaşmaga ukyplydyr. Her robotyň göterim ukyby 50 kilogram bolup, batareýasynyň zarýady 8 sagatlap üznüksiz işlemäge ýeterlikdir. Şeýle hem, “robopingwinler” giňeldilen funksiýalara eýedir: ýörite dok-stansiýalarda awtomatiki zarýad bermek, 1 santimetrlik takyklyk bilen päsgelçilikleri tanamak, ugurlary dessine sazlamak üçin 5G aragatnaşyk goldawy, temperatura duýgur harytlar üçin howa bölümleri, adatdan daşary ýagdaýlarda tiz togtadylýan ulgam we üç derejeli tizlik (0,5-den 1,5 m/s çenli) bilen işlemek mümkinçiligi. Bu eltip berijiler ýolagçy sazlaşygy az bolan wagtlarda işläp, stansiýalaryň arasynda ugurlary özbaşdak düzýärler. Olar paýlaýyş terminallarynda harytlar bilen ýüklenip, olary 7-Eleven dükanlaryna takyk we tiz eltmek bilen, eltip bermek wagtyny 2 sagatdan bary-ýogy 20–30 minuda çenli gysgaldýar.

Bu innowasion başlangyç Hytaýda mart aýynda kabul edilen “Akylly robotlary ösdürmegiň meýilnamasyna” doly laýyk gelýär. 1600-den gowrak robot tehnikasyna degişli kompaniýalar hasaba alnan Şençžen şäheri şäher awtomatizasiýasynyň esasy synag meýdançalarynyň birine öwrülýär. Hytaýda başga-da köp robotlaşdyrylan ulgamlaryň işlenip düzülmegi bu ugurdaky global ösüş tendensiýalaryny tassyklaýar.

Synag taslamasynyň üstünlikli geçmegi bilen şeýle robotlaryň sanyny 200-e çenli artdyrmak, şeýle hem dermanhanalary, poçta bölümlerini we arassalaýyş gulluklaryny bu ulgam bilen baglanyşdyrmak meýilleşdirilýär. Bilermenleriň pikiriçe, 2–3 ýylyň dowamynda şeýle çözgütler dünýäniň iri şäherlerinde adaty düzgüne öwrülip biler. Häzirki wagtda robopingwinler ýolagçylaryň ünsüni çekýär, ýöne ýakyn geljekde şäher keşbiniň gündelik bir bölegine öwrülmegi ähtimal.

ORIENT

Foto: vanke