Türkmenistanyň Daşary işler ministri Raşid Meredow, Hytaý Halk Respublikasynyň Daşary işler ministriniň çakylygy boýunça, Hytaýyň Birleşen Milletler Guramasynyň Howpsuzlyk Geňeşine başlyklyk etmeginiň çäklerinde geçirilýän ýokary derejeli açyk pikir alyşmalaryna gatnaşmak üçin Nýu-Ýorka iş sapary başlady. Mejlis BMG-niň Tertipnamasynyň maksatlaryna we ýörelgelerine eýerilmegi hem-de Guramanyň merkezi ornuna esaslanýan halkara hyzmatdaşlyk arhitekturasyny kämilleşdirmek ýaly düýpli temalara bagyşlanýar. Saparyň dowamynda we meýilleşdirilen ikitaraplaýyn duşuşyklarda türkmen wekiliýeti strategik durnuklylygy üpjün etmek, köptaraply hyzmatdaşlygy ösdürmek we häzirki zaman geosyýasy proseslerinde BMG-niň abraýyny ýokarlandyrmak bilen göni bagly bolan ählumumy gün tertibiniň esasy meselelerini jikme-jik ara alyp maslahatlaşmagy maksat edinýär.

Howpsuzlyk Geňeşiniň münberinden Türkmenistanyň adyndan çykyş edip, daşary syýasat edarasynyň ýolbaşçysy Aşgabadyň ynanyşmak medeniýetini we öňüni alyş diplomatiýasyny ilerletmäge esaslanýan ugry yzygiderli durmuşa geçirýändigini nygtady.

Türkmen diplomatynyň çykyşynda türkmen halkynyň Milli Lideri, Türkmenistanyň Halk Maslahatynyň Başlygy we Türkmenistanyň Prezidenti tarapyndan öňe sürülen ähmiýetli ählumumy halkara başlangyçlara aýratyn üns berildi. Hususan-da, howpsuzlyk bilen durnukly durmuş-ykdysady ösüşiň arasyndaky özara baglanyşygy açyp görkezýän “Ösüş arkaly parahatçylyk” konsepsiýasy jikme-jik tanyşdyryldy.

Şu nukdaýnazardan, Raşid Meredow 2025-nji ýylyň awgustynda Türkmenistanda üstünlikli geçirilen we howa gün tertibi, energetika hem-de durnukly ulag düzümi ulgamynda çözgütleri işläp düzmek üçin abraýly meýdança öwrülen BMG-niň Deňze çykalgasy bolmadyk ösüp barýan döwletler boýunça üçünji maslahatynyň (LLDC-3) netijelerini belläp geçdi. Wekiliýetiň ýolbaşçysy dünýä jemgyýetçiligini şol forumyň jemleri boýunça kabul edilen Awaza syýasy Jarnamasyny we onýyllyk Hereketleriň Awaza maksatnamasyny iş ýüzünde hem-de netijeli durmuşa geçirmäge çagyrdy.

Mundan başga-da, güýç ulanmakdan ýüz öwrüp, onuň deregine konstruktiw gepleşikleri öne sürýän “Dialog — parahatçylygyň kepili” filosofiýasyna, şeýle hem parahatçylygy döretmek ulgamynda ýokary derejeli hünärmenleri taýýarlamak üçin ýöriteleşdirilen Parahatçylyk we bitaraplyk uniwersitetini döretmek baradaky başlangyja aýratyn üns çekildi.

Gelejekde Türkmenistan Ählumumy howpsuzlyk strategiýasyny işläp taýýarlamagy we 2028-nji ýyly “Halkara hukugy ýyly” diýip yglan etmek baradaky teklibi öne sürmegi maksat edinýär. Şunlukda, ýurdumyzyň başlangyjy bilen BMG-niň Baş Assambleýasy tarapyndan yglan edilen 2025-nji ýyldaky “Halkara parahatçylyk we ynanyşmak ýylynyň” dowamy hökmünde özara düşünişmek ýörelgelerini ösdürmek göz öňünde tutulýar.

Raşid Meredowyň ýokary derejeli açyk pikir alyşmalaryň dowamynda Parahatçylygyň, howpsuzlygyň we durnukly ösüşiň bähbidine Bitaraplygyň dostlary toparynyň adyndan eden aýratyn çykyşy BMG-niň meýdançasynda türkmen diplomatiýasynyň barha artýan abraýynyň möhüm subutnamasy boldy. Ministr bu köptaraply bileleşigiň bitewi garaýyşlaryny beýan etmek bilen, bilelikdäki işiň dört sany strategik ugruny anyk kesgitledi.

Birinjiden, Birleşen Milletler Guramasynyň merkezi ornunyň hem-de BMG-niň Tertipnamasynyň maksatlarynyň we ýörelgeleriniň häzirki zaman halkara gatnaşyklarynyň esasy hökmünde üýtgewsiz ähmiýetiniň bardygy tassyklanyldy.

Ikinjiden, häzirki halkara meselelerini çözmekde diplomatiýanyň, araçylyk etmegiň we dialogyň barha artýan ornuna üns çekildi. Şunuň bilen baglylykda, topar Türkmenistanyň başlangyjy bilen 2026-njy ýylyň 20-nji maýynda BMG-niň Baş Assambleýasy tarapyndan kabul edilen «Halkara parahatçylygy, howpsuzlygy we durnukly ösüş işini goldamakda hem-de berkitmekde bitaraplyk syýasatynyň orny we ähmiýeti» atly Kararnamanyň kabul edilmegini gutlady. Türkmenistanyň daşary syýasat edarasynyň ýolbaşçysy bitarap döwletleriň çäkleriniň parahatçylyk gepleşikleri, dialog meýdançalary we araçylyk prosesleri üçin ulanylmagyna goldaw beýan edildi.

Üçünjiden, sebitleýin we sebitara baglanyşygy, durnukly ulag ulgamlaryny we ykdysady hyzmatdaşlygy pugtalandyrmagyň durnuklylygyň, ynamyň we ösüşiň möhüm şertleri bolup durýandygy bellenildi.

Dördünji ugur köptaraplaýyn diplomatiýanyň hakyky netijeliligini ýokarlandyrmagyň zerurlygyna bagyşlandy. Şunuň bilen baglylykda, türkmen diplomaty öz çykyşynyň ahyrynda ähli Bitaraplygyň dostlary toparynyň adyndan BMG-niň howandarlygyndaky konstruktiw halkara dialoga ygrarlydyklaryny tassyklady.