Täjigistanyň paýtagtynda 25–28-nji maý aralygynda «Suw durnukly ösüş üçin» diýlip atlandyrylan halkara hereket onýyllygyna bagyşlanan dördünji ýokary derejeli halkara maslahaty geçirildi. Duşenbe şäherindäki «Kohi Somon» köşgünde Prezident Emomali Rahmonyň gatnaşmagynda dabaraly açylyşy bolan bu uly göwrümli ekologiýa forumyna Türkmenistanyň Ministrler Kabinetiniň Başlygynyň orunbasary Taňryguly Atahallyýewiň ýolbaşçylygyndaky türkmen wekiliýeti gatnaşdy.
Dünýäniň onlarça ýurdundan gelen wekilleriň esasy ünsi BMG-niň Durnukly ösüş maksatlarynyň altynjysyny durmuşa geçirmegi çaltlandyrmagyň gurallaryna, şeýle hem Birleşen Milletler Guramasynyň suw serişdeleri boýunça öňde duran maslahatyna taýýarlyk görmegiň çäklerinde ählumumy gün tertibini işläp taýýarlamaga gönükdirildi.
Forumyň umumy mejlisinde çykyş edip, türkmen wekiliýetiniň ýolbaşçysy resmi Aşgabadyň suw serişdelerine aýawly çemeleşmegi sebit durnuklylygynyň, howpsuzlygynyň we uzak möhletleýin ykdysady ösüşiň esasy şerti hökmünde garýandygyny, munuň bolsa Merkezi Aziýanyň suw serişdeleriniň serhetüsti häsiýete eýedigi bilen aýratyn ähmiýetlidigini nygtady.
Türkmenistan suw serişdelerini paýlamagyň we dolandyrmagyň halkara hukugynyň berk kadalary esasynda hem-de BMG-niň öňdebaryjy utgaşdyryjy wezipesine esaslanýan, adalatly, durnukly we ylmy taýdan berk esaslandyrylan ulgamynyň kemala getirilmegi ugrunda yzygiderli çykyş edýär.
Bu maksada ýetmegiň amaly guraly hökmünde, türkmen tarapy BMG-niň howandarlygynda sebitdäki ähli döwletleriň bähbitlerini utgaşdyrmagyň hemişelik, netijeli mehanizmine öwrülmegi maksat edinýän Merkezi Aziýa üçin Suw meseleleri boýunça Sebit geňeşini döretmek baradaky strategik teklibiniň ähmiýetini aýratyn belledi.
Maslahata gatnaşyjylarda Aşgabadyň ählumumy howanyň üýtgemeginiň täsirlerini azaltmaga gönükdirilen beýleki ekologiýa başlangyçlary hem uly gyzyklanma döretdi. Türkmen wekiliýeti Merkezi Aziýada howanyň üýtgemegi bilen baglanyşykly tehnologiýalar boýunça Sebit merkezini hem-de Çölleşmäge garşy göreş boýunça Sebit merkezini döretmek başlangyçlarynyň derwaýyslygy tassyklanyldy. Bu merkezleriň döredilmegi ylmy hyzmatdaşlygy ösdürmäge, tehnologiýalary alyşmaga we sebit hyzmatdaşlygyny pugtalandyrmaga mümkinçilik berer.
Ondan soňky tematik sessiýalaryň dowamynda Türkmenistanyň wekilleri ýurduň biologik dürlüligi saklamak we suw serişdelerini toplumlaýyn dolandyrmak babatda BMG-niň esasy konwensiýalaryna üýtgewsiz ygrarlydygyny tassykladylar. Şeýlelikde, olar dünýä bileleşigine Aşgabadyň döwrümiziň ekologiýa wehimlerini çözmekde toplumlaýyn we ylmy taýdan esaslandyrylan çemeleşmäni öňe sürmäge taýýardygyny görkezdiler.
