Biz ýakynlaşmagy ugur edinýäris

30-nji iýulda, çarşenbe güni Prezident Serdar Berdimuhamedow Balkan welaýatyna iş saparyny amala aşyryp, onuň dowamynda Türkmenbaşy Halkara howa menzili we “Awaza” milli syýahatçylyk zolagynda ýakyn wagtda geçiriljek BMG-niň Deňze çykalgasy bolmadyk ösüp barýan ýurtlar boýunça üçünji maslahatynyň ýokary guramaçylyk derejesinde geçirilmegi bilen bagly ýerine ýetirilen işler bilen tanyşdy. Bu möhüm halkara forum sebit we bütin dünýä üçin möhüm waka bolar.

Türkmenistan: Durnukly ösüş ýolunda BMG-niň esasy hyzmatdaşy

Türkmenbaşy şäherine baryp, döwlet Baştutany maslahatyň geçiriljek ýerine ugrady. Bu ýerde Prezident Serdar Berdimuhamedowy Ministrler Kabinetiniň Başlygynyň orunbasary, daşary işler ministri Raşid Meredow we beýleki resmi adamlar garşylady. DIM-niň ýolbaşçysy toplumyň çäginde abadanlaşdyryş hem-de foruma gatnaşyjylar üçin ähli amatlyklary döretmek boýunça ýerine ýetirilen işler barada maglumat berdi. Bellenilişi ýaly, maslahata gatnaşyjylaryň oňaýly dynç almaklary, toplumyň çägindäki seýilgähde gezelenç etmekleri üçin ähli zerur şertler döredildi. Mundan başga-da, bu ýerde hyzmatlar ulgamynyň işi talabalaýyk ýola goýuldy.

Öňde boljak forumyň aýratyn ähmiýetine ünsi çekip, Prezident Serdar Berdimuhamedow wekilçilikli forumyň geçiriljek ýeri hökmünde Türkmenistanyň saýlanylmagy Birleşen Milletler Guramasy bilen köpugurly strategik hyzmatdaşlygyň yzygiderli giňelýändigini görkezýär. Bu hyzmatdaşlyk Türkmenistanyň daşary syýasatynyň ileri tutulýan ugurlarynyň biridir we ählumumy abadançylygyň we ösüşiň bähbitlerine doly laýyk gelýärÝurtda şeýle giň gerimli çäräniň geçirilmegi, Türkmenistanyň Durnukly ösüş maksatlaryna ýetmek ugrundaky tagallalary utgaşdyrmak işine işjeň gatnaşýandygyny nygtaýar.

Awazada ählumumy dialog: Baý maksatnama we gatnaşyjylaryň ýokary derejesi

BMG-niň Deňze çykalgasy bolmadyk ösüp barýan ýurtlar boýunça üçünji maslahaty, ösüp barýan ýurtlardan ýokary derejeli wekiliýeti, şeýle hem BMG-a beýleki agza döwletleriň wekillerini, halkara we sebit guramalarynyň, maliýe guramalarynyň, kanun çykaryjy guramalaryň, jemgyýetçilik birleşikleriniň we hususy pudagyň wekillerini birleşdirer diýlip garaşylýar.

Forumyň çäginde köp sanly çäreleriň geçirilmegi meýilleşdirildi: syýasy-diplomatik duşyklar, söwda-ykdysady çekişmelerden başlap medeni-ynsanperwer başlangyçlara çenli. Bu çäreleriň ýokary guramaçylygy üçin ähli şertler eýýäm döredildi.

Medeni diplomatiýa: Sungat arkaly dostluk köprüleri

Esasy maslahatyň geçjek ýerini gözden geçirenden soň, Türkmenistanyň Prezidenti “Awaza” milli syýahatçylyk zolagynyň medeni infrastruktura desgalaryna baryp gördi. Bu ýerde, Hazaryň kenarynda, Awazanyň medeni alyş-çalyş merkezi hökmünde derejesini tassyklaýan däp bolan uly göwrümli halkara duşuşyklar, forumlar, konsertler we festiwallar geçirilýär.

Maslahatyň çäginde guraljak dabaralar ýurtlaryň arasyndaky dostluk köprüsini ep-esli pugtalandyrmaga, halklaryň medeniýetinde we sungatynda gazanylan üstünlikler bilen ýakyndan tanyşmaga ýardam berer. Bellenilişi ýaly, dabaraly çäreler Garaşsyz, baky Bitarap Türkmenistan bilen dünýä döwletleriniň arasynda özara hyzmatdaşlygy has-da ösdürmäge, milli mirasymyzy, medeni gymmatlyklarymyzy giňden wagyz etmäge gönükdirilendir.

Türkmenistanyň Bitaraplyk syýasatynyň aýrylmaz bölegi bolan medeni diplomatiýanyň özeninde durýan parahatçylygyň, dostlugyň, özara düşünişmegiň we ynsanperwer ýörelgeleriň halklary ýakynlaşdyrýar.

Wagtyň synagyndan geçen myhmansöýerlik: Prezident kabul edişligi iň ýokary dereje geçirmegi tabşyrdy

Döwlet Baştutany myhmanlary kabul etmek, olary türkmen halkynyň gadymdan gelýän myhmansöýerlik däplerine laýyklykda garşylamak bilen bagly geçirilen işler bilen hem tanyşdy. Häzirki wagtda dynç alşyň naýbaşy mümkinçiliklerini özünde jemleýän Awazanyň döwrebap myhmanhanalary Hazaryň ajaýyp kenaryna bezeg berýär. Bu ýerde göwnejaý dynç almak üçin ähli şertler bar.

Myhmanlary garşylamak meselesine aýratyn ähmiýet berip, Prezident Serdar Berdimuhamedow öňde boljak foruma hemmetaraplaýyn jogapkärçilikli çemeleşmek babatda degişli tabşyryklary berdi we Türkmenistanyň çäräni iň ýokary derejede geçirmegi maksat edinýändigini nygtady.

ORIENT

Foto: orient.tm