Parižde Aşgabadyň ÝUNESKO-nyň döredijilik şäherleriniň toruna girizilmegine baha berildi
11.11.2023 | 13:20 |
ÝUNESKO-nyň işleri boýunça Türkmenistanyň Milli toparynyň jogapkär sekretary Çynar Rüstemowa guramanyň aragatnaşyk, şäherler we medeni çäreler bölüminiň, şeýle hem ÝUNESKO-nyň şäherleri platformasynyň başlygy Denis Baks bilen duşuşdy.
Duşuşykda taraplar Aşgabadyň döredijilik şäherleriniň toruna goşulmagyna baha berdiler we bu ugurda täze taslamalary durmuşa geçirmek işlerini işjeňleşdirmek üçin çäreleri kesgitlediler. Bu barada ÝUNESKO-nyň işleri boýunça Türkmenistanyň Milli topary "ORIENT-e" habar berdi.
Denis Baks türkmen paýtagtynyň ÝUNESKO-nyň döredijilik şäherleriniň toruna goşulmagynyň Türkmenistan bilen ÝUNESKO-nyň arasyndaky hyzmatdaşlygyň mundan beýläk-de ösdürilmegine, şeýle hem Durnukly ösüş maksatlarynyň 11-nji maksadynyň milli derejede durmuşa geçirilmegine goşant goşjakdygyny aýtdy. Bu maksat şäherleri durnukly we adamlar üçin amatly ösdürmegi maksat edinýär.
Çynar Rüstemowa, geçen ýyl Aşgabat şäheriniň dizaýnerleri, binagärleri we işläp düzüjileri üçin okuwlary guramakda ýakyndan ýardam edendigi üçin Denis Baksa hoşallyk bildirdi. Bu çäräniň Türkmenistanyň döredijilik wekilleriniň bilimlerini we tejribelerini artdyrmaga goşant goşandygy bellenildi.
Çynar Rüstemowanyň balyklygyndaky türkmen wekiliýeti şu günler Pariş şäherinde ÝUNESKO-nyň Baş maslahatynyň işine gatnaşýar. Guramanyň sekretariaty belli seneleri ÝUNESKO-nyň şanly seneleriniň sanawyna goşmak babatda 39 döwletden eýýäm 55 töweregi ýüztutmany kabul etdi. Şolaryň içinde beýik türkmen şahyry Magtymguly Pyragynyň doglan gününiň 300 ýyllyk şanly senesi hem bar.
Guramanyň çäginde ýörite döredilen pudagara topar ÝUNESKO-nyň sanawyna goşmak üçin 46 teklibi saýlap aldy. Saýlanyp alnan teklipler we haýsy seneleriň ÝUNESKO-nyň şanly seneleriniň sanawyna goşulandygy şu gün belli bolar we bu sanaw tassyklanar.
ORIENT news
