Biz ýakynlaşmagy ugur edinýäris

23-nji aprel, çarşenbe güni Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Gyrgyzystana iş saparynyň çäginde Çolpan-Ata şäherinde Gyrgyz Respublikasynyň Sadyr Žaparow bilen gepleşik geçirdi.

Taraplar söwda-ykdysady hyzmatdaşlygy, medeni-ynsanperwer gatnaşyklary we sebit başlangyçlary ýaly ikitaraplaýyn hyzmatdaşlygyň meseleleriniň giň toplumyny ara alyp maslahatlaşdylar.

Ýokary derejeli myhmany mübärekläp, Prezident Sadyr Žaparow, gyrgyz we türkmen halklarynyň arasyndaky köpasyrlyk dostlugy berkitmek işinde Gurbanguly Berdimuhamedowyň saparynyň ähmiýetini nygtady diýip, Respublikanyň Baştutanynyň web sahypasynda habar berilýär.

Sadyr Žaparow iki ýurduň arasyndaky söwda hyzmatdaşlygyndaky ynamly oňyn depgini, şeýle hem Gyrgyzystanyň Russiýa, Wengriýa, Özbegistan we Azerbaýjan bilen ikitaraplaýyn ösüş gaznalaryny döretmek boýunça bar bolan tejribesine laýyklykda Gyrgyz-Türkmen Ösüş Gaznasyny döretmek baradaky taslamany durmuşa geçirmegiň möhümdigini belledi.

Türkmenistanyň Halk Maslahatynyň Başlygy Gurbanguly Berdimuhamedow mähirli garşylanandygy üçin Gyrgyzystanyň Prezidentine minnetdarlyk bildirdi hem-de iki ýurduň arasynda çuňňur we köptaraplaýyn hyzmatdaşlyga taýýardygyny mälim etdi. Türkmen halkynyň Milli Lideri söwda, gaz, energetika, ulag, medeniýet we bilim ýaly ähli möhüm ugurlarda işjeň hyzmatdaşlyga türkmen tarapynyň islegini we taýýardygyny nygtady.

Gepleşikleriň ikitaraplaýyn hyzmatdaşlygyň täze geljegini açjakdygyna ynam bildirildi. Şu nukdaýnazardan Sadyr Žaparow “Agzybirlik – bu arzuwlary hakykata öwürýän güýçdir” diýip, türkmeniň beýik akyldary Magtymguly Pyragynyň sözlerinden mysal getirdi diýip, Gyrgyzystanyň Prezidentiniň metbugat gullugynyň habarynda aýdylýar.

ORIENT

Foto: president.kg