Biz ýakynlaşmagy ugur edinýäris

Düýn, maý aýynyň 19-na, Aşgabatdaky Döwlet medeniýet merkeziniň Mukamlar köşgünde «Parahatçylyk sazlary» atly halkara festiwaly öz gapylaryny açdy. Bu diňe bir sungat ussatlarynyň çykyşlarynyň yzly-yzyna berilmegi däl-de, göwünleriñ dialogy bolup, onda sazlaryň notalary serhetleri aradan aýyryp, halklaryň arasynda özara düşünişmegiň köprülerini gurýan köpugurly dile öwrülýär.

Festiwal sungatyň birleşdiriji güýjüne bagyşlanan aýdym bolup, dürli düşünişmezlikleriň köpelýän döwründe saz arkaly ýagşylygyň, gözelligiň, ynanyşmagyň we sazlaşygyň mümkindigini subut edilýär. Aşgabadyň sahnasyna Russiýa Federasiýasynyñ, Hytaý Halk Respublikasynyň, Fransiýanyň, Eýranyň, Ermenistanyň, Azerbaýjanyň, Gazagystanyň, Gyrgyzystanyň we Özbegistanyň meşhur kompozitorlary, dirižýorlary, opera aýdymçylary we ussat sazandalary çykdy. Olaryň gatnaşmagy döredijiligiň hyzmatdaşlyga itergi berýändiginiň we medeni gatnaşyklary güýçlendirýändiginiň aýdyň subutnamasydyr.

Festiwalyň dabaraly açylyş konserti zehinleriň we dürlüligiň simfoniýasyna öwrüldi. Onda Türkmenistanyň Döwlet simfoniki orkestriniñ we Döwlet horunyň, şeýle hem ýurdumyzyň we daşary ýurtlaryň sahnalarynyň ýyldyzlarynyň gatnaşmagynda çykyşlar boldy. Agşamyň maksatnamasynda dünýä operasynyň baý däplerine esaslanýan we dürli opera mekdepleriniň ajaýyp wokal nusgalary görkezildi. Sahnadan «Aleko», «Maýsaranyň oýunlary» operalaryndan, «Arşyn mal alan» operettasyndan parçalar, şeýle hem Nury Halmämmedowyň we beýleki meşhur kompozitorlaryň öçmejek eserleri ýaňlandy. Her bir çykyş ýönekeý ýerine ýetiriş däldi, eýsem hyjuwdan we ylhamdan doly medeni alyş-çalyş hereketi boldy.

Şu gün, maý aýynyň 20-sine, festiwal baý mazmunly maksatnamasyny dowam etdirer. Şeýlelikde, ýerli we daşary ýurtly sungat işgärleriniň arasynda tejribe alyşmaga mümkinçilik berýän döredijilik duşuşyklary, şeýle hem daşary ýurtly meşhur artistleriň geçirýän birnäçe ussatlyk sapaklary meýilleşdirilýär. Bu duşuşyklar ýaş zehinleriň ösüşine örän gymmatly goşant bolup, geljekki nesil sazandalara ruhy ylham çeşmesi bolar.

Baýramçylygyň esasy pursady ýene-de ýurdumyzyň we daşary ýurtlaryň iň gowy sungat ussatlarynyň gatnaşmagynda geçiriljek dabaraly konsert bolar. Aşgabatda geçirilýän «Parahatçylyk sazlary» diňe bir festiwal däl – bu häzirki global synaglar döwründe sungatyň dünýäde parahatçylygyň güýçli guralydygyny we iň beýik päsgelçilikleriň hem üstünden köpri gurup bilýändigini görkezýän beýannamadyr. Aşgabat şeýle gepleşikleriň merkezine öwrülip, ýene-de bir gezek parahatçylyk söýüji döwletiň paýtagty hökmünde öz ornuny tassyklaýar.

ORIENT

Foto: tdh.gov.tm