Biz ýakynlaşmagy ugur edinýäris

Zähmet we ilaty durmuş taýdan goramak ministri Muhammetseýit Sylapowyň ýolbaşçylygyndaky Türkmenistanyň wekiliýeti 3-13-nji iýun aralygynda Ženewada geçirilýän Halkara zähmet maslahatynyň (HZM) 113-nji mejlisiniň işine gatnaşýar.

Ministr Sylapow maslahatyň plenar mejlisinde eden çykyşynda ýurduň durmuş adalatlygy, mynasyp iş we halkara hyzmatdaşlygy ýörelgelerine ygrarlydygyny nygtady. Ol Halkara zähmet guramasynyň Baş direktorynyň “Iş ýerleri, hukuk we ösüş: özarabaglanşygy pugtalandyrmak” atly hasabatynda teklip edilen çemeleşmeleriň 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda öz beýanyny tapan Türkmenistanyň degişli strategiýasyna laýyk gelýändigini belläp geçdi.

Ministr, zähmet we iş üpjünçiligi babatynda döwlet syýasatyny emele getirmegiň täsirli guraly hökmünde barha artýan durmuş ugurly dialogyň ykrar edilmegini aýratyn belledi.

Plenar mejlisde Türkmenistanyň Kärdeşler arkalaşyklarynyň Milli merkeziniň başlygy Oguljennet Berdiliýewa Oguljennet Berdiliýewa hem çykyş edip, ýurduň kärdeşler arkalaşyklarynyň üç taraplaýyn özara gatnaşyk görnüşinde durmuş ugurly döwlet syýasatynyň emele gelmegine işjeň gatnaşýandygyny belledi.

Zähmet konwensiýalaryny ulanmakda ähmiýetli ösüş

Maslahatyň gün tertibi – halkara zähmet standartlarynyň ulanylmagy, biologik töwekgelçiliklerden gorag, platforma ykdysadyýetinde mynasyp zähmeti ösdürmek we resmi däl işe garşy göreş çäreleri öz içine alýar. Şeýle hem, halkara zähmet konwensiýalarynyň bozulmagy bilen baglanyşykly birnäçe ýurtlardaky ýagdaýlary öwrenýär. Soňky birnäçe ýylyň dowamynda Türkmenistan 105-nji konwensiýanyň (mejbury zähmetiň ýatyrylmagy barada) ulanylmagy bilen baglanyşykly Halkara zähmet guramasyny alada goýýan ýurtlaryň sanawyna birnäçe gezek girizildi. Bu mesele maslahatyň 105-nji, 109-njy, 111-nji we 112-nji sessiýalarynyň çäginde aýratyn garaldy.

Bellemek hökmandyr, şu ýyl Türkmenistan, jikme-jik seredilmeli ýurtlaryň gysga sanawyndan aýryldy, bu Türkmenistanyň Hökümetiniň Halkara zähmet guramasy bilen bilelikde kemçilikleri ýok etmek we 105-nji konwensiýany ulanmak tejribesini gowulandyrmak boýunça alyp barýan işleriniň möhüm netijesidir diýip, Ženewadaky Türkmenistanyň ilçihanasynyň metbugat beýanatynda bellenilýär.

Türkmen wekiliýetiniň Ženewa amala aşyran sapary, ýurduň mynasyp zähmete we halkara hyzmatdaşlygy ýörelgelerine ygrarlydygyny tassyklaýan birnäçe möhüm duşuşyklaryň geçirilmegi bilen tapawutlandy.

HZG-iň ýolbaşçylyklary bilen duşuşyklar

Sessiýanyň dowamynda ministr Muhammetseýit Sylapow bilen Halkara zähmet guramasynyň Baş direktory Žilber Hungbo we Baş direktoryň kömekçisi - Ýewropa we Merkezi Aziýa sebiti boýunça direktory Beata Andrees arasynda möhüm duşuşyklar geçirildi.

Žilber Hungbo bilen geçirilen gepleşiklerde hyzmatdaşlygyň oňyn depgini we HZG-niň konwensiýalaryny öňe sürmekde hem-de zähmet kanunçylygyny gowulandyrmakda gazanylan netijeler bellendi. Ministr Sylapow HZG-niň Baş direktoryny, Türkmenistanyň hemişelik Bitaraplyk derejesine eýe bolmagynyň 30 ýyllygyna bagyşlanan Aşgabatda geçiriljek çärelere gatnaşmaga çagyrdy. Baş direktor bu çakylygy minnetdarlyk bilen kabul etdi. Jenap Hungbo, öz gezeginde, özara gatnaşyklaryň ösüş depgini, esasanam pagtaçylyk pudagy bilen baglanyşykly ösüşe ýokary baha berdi we HZG-niň standartlaryny ulanmak baradaky komitetiň tekliplerini mundan beýläk-de durmuşa geçirmegiň möhümdigini aýtdy.

Beate Andrees bilen geçirilen duşuşygyň dowamynda taraplar hyzmatdaşlygyň häzirki ýagdaýy, gazanylan netijeler we mundan beýläkki özara gatnaşyklar meýilnamalary ara alnyp maslahatlaşdylar hem-de 105-nji konwensiýanyň çäginde Türkmenistanyň işleriniň HZG-niň gün tertibinden doly çykarylmagyna aýratyn üns berdiler. Kärdeşler arkalaşyklary we zähmet üpjünçili birleşikleriniň işjeň gatnaşmagy bilen konstruktiw hyzmatdaşlygy dowam etdirmek barada ylalaşyk gazanyldy.

Halkara hyzmatdaşlar bilen durmuş ugurly dialogy pugtalandyrmak

Türkmen wekiliýetiniň esasy halkara hyzmatdaşlary – Halkara iş berijiler guramasynyň (IOE) Baş sekretary Roberto Suarez-Santos we Halkara kärdeşler arkalaşygynyň konfederasiýasynyň (ITUC) Baş sekretary Luk Triangle bilen möhüm duşuşyklary geçirdi.

IOE bilen hyzmatdaşlygy çuňlaşdyrmak, tehniki goldaw, milli iş berijileriň gatnaşygyny giňeltmek we zähmet kanunçylygyny sazlaşdyrmagyň geljegi ara alnyp maslahatlaşyldy. Türkmen tarapy, işjeň özara hyzmatdaşlyk etmäge we HZG-niň konwensiýalaryna goşulmaga taýýardygyny tassyklady.

ITUC bilen geçirilen duşuşykda üçtaraplaýyn hyzmatdaşlygy (hökümet – iş berijiler – kärdeşler arkalaşyklary) giňeltmek, şol sanda Türkmenistanyň “Durmuş we zähmet gatnaşyklaryny kadalaşdyrmak boýunça üç taraplaýyn komissiýa barada” we 144-nji konwensiýany tassyklamak meselesi ara alnyp maslahatlaşyldy. ITUC, Türkmenistanyň açyklygyny we üçtaraplaýyn hyzmatdaşlykda alyp barýan işinden kanagatlanýandygyny mälim etdi, käbir talaplara laýyklykda Türkmenistanyň Kärdeşler Arkalaşyklarynyň geljekde ITUC-da agza bolmagy mümkinçiligini ara alyp maslahatlaşdy.

Türkmenistan wekiliýetiniň Ženewa amala aşyran sapary ýurduň milli ileri tutulýan ugurlary we ählumumy standartlary göz öňünde tutup, durmuş ugurly dialogy ösdürmek we halkara zähmet borçnamalaryny doly ýerine ýetirmek ýaly hyzmatdaşlygy has-da giňeltmek islegini tassyklady.

ORIENT

Foto: switzerland.tmembassy.gov.tm