Biz ýakynlaşmagy ugur edinýäris

17-nji iýunda Gazagystanyň paýtagty Astanada “Merkezi Aziýa – Hytaý” II sammiti geçiriler. Bu barada Gazagystanyň KHBS Akorda salgylanyp habar berýär. Oňa alty ýurduň döwlet Baştutanlary gatnaşar: Hytaý, Gazagystan, Gyrgyzystan, Täjigistan, Türkmenistan we Özbegistan.

Gün tertibinde – Hytaý bilen Merkezi Aziýanyň arasyndaky mundan beýläkki hyzmatdaşlygyň geljegi ara alnyp maslahatlaşylýar. Taraplaryň söwda, ykdysady we ynsanperwer gatnaşyklaryny ösdürmek, sebitleýin howpsuzlygy berkitmek boýunça bilelikdäki çemeleşmeleri işläp düzmekligine garaşylýar.

Sammitiň öňýanynda ýokary derejeli hytaý-gazak gepleşikleri bolar. HHR-niň Başlygy Si Szinpin 16-njy iýunda iki günlük resmi sapar bilen Gazagystana barar.

Hytaýyň gatnaşyklary Merkezi Aziýa ýurtlary bilen 1992-nji ýyldan bäri, diplomatik gatnaşyklar ýola goýlandan bäri ösdürilýär. 2023-nji ýylyň maý aýynda “Hytaý – Merkezi Aziýa” formatynda birinji sammit geçirilmegi we ýolbaşçylaryň duşuşyklarynyň degişli mehanizminiň işe girizilmegi bilen olar täze itergi aldylar.

HHR sebitiň iň uly söwda hyzmatdaşy we esasy maýa goýujysy hasaplanýar. 2024-nji ýylda Hytaý bilen Merkezi Aziýa ýurtlarynyň arasyndaky söwda dolanşygynyň umumy mukdary 94,8 milliard ABŞ dollaryna deň boldy. Taraplar şeýle hem medeni hyzmatdaşlygy ösdürýär: 29-njy maýda birinji halkara syýahatçylyk otlusy Siandan sebitiň ýurtlaryna ugrady. Bu bolsa ynsanperwer ugurdaky alyş-çalşygynda täze ädim boldy.

ORIENT

Foto: globaltimes.cn