Biz ýakynlaşmagy ugur edinýäris

Hytaý Halk Respublikasynyň Başlygy Si Szinpin we Döwlet Geňeşiniň Premýeri Li Sýan Hytaý Halk Respublikasynyň döredilmeginiň 76 ýyllygy mynasybetli gutlag iberendigi üçin Türkmenistanyň Prezidenti Serdar Berdimuhamedowa minnetdarlyk hatlaryny iberdiler.

Si Szinpin şu ýylyň başyndan bäri Türkmenistanyň Prezidenti bilen iki gezek duşuşyk geçirilendigini, olaryň barşynda hemmetaraplaýyn hytaý-türkmen strategik hyzmatdaşlyk gatnaşyklaryny çuňlaşdyrmak boýunça möhüm ylalaşyklaryň gazanylandygyny belledi. Ol bu ylalaşyklaryň iki ýurduň arasyndaky köpugurly, özara bähbitli hyzmatdaşlygyň ösdürilmegine kuwwatly itergi berendigini nygtady.

HHR-iň Başlygy Türkmenistanyň Prezidenti bilen iki ýurduň halklarynyň bähbidine Hytaýyň we Türkmenistanyň has ýakyn “Bitewi ykbal bileleşigini” gurmak üçin bilelikde tagalla etmäge taýýardygyny beýan etdi. Ol Serdar Berdimuhamedowa berk jan saglyk we abadançylyk, dostlukly Türkmenistana ösüş hem-de rowaçlyk, türkmen halkyna bolsa bagtyýarlyk arzuw etdi.

Li Sýan hem öz hatynda Türkmenistanyň Prezidentine iberen gutlagy üçin minnetdarlyk bildirdi. Döwlet Geňeşiniň Premýeri Hytaýyň Hökümetiniň hytaý-türkmen gatnaşyklarynyň ösdürilmegine uly üns berýändigini aýdyp, Hytaý tarapy türkmen tarapy bilen dürli ulgamlarda iki ýurduň özara bähbitli hyzmatdaşlygyny yzygiderli çuňlaşdyrmaga, hytaý-türkmen hemmetaraplaýyn strategik hyzmatdaşlyk gatnaşyklaryny ilerletmäge hem-de täze derejä çykarmaga taýýardygyny belledi.

Li Sýan Türkmenistanyň Prezidentine berk jan saglyk we rowaçlyk, dostlukly türkmen halkyna bolsa bagtyýarlyk we abadançylyk arzuw etdi.

Foto: oilgas.gov.tm